‘தேங்கி நின்ற மழை நீரில்’.. ‘கைக்குழந்தையுடன் விழுந்த பெண்.. தலை வரையிலும் மூழ்கிய விபரீதம்’!

ஹைதராபாத்தில் பலத்த மழையால், சாலையில் உள்ள பள்ளத்தில் மழைநீர் தேங்கியிருந்த நிலையில் பெண் ஒருவர் கைக்குழந்தையுடன் அதில் விழுந்த காட்சி பதைபதைக்கவைத்துள்ளது.

இந்த நேரத்தில் காரில் அங்குவந்த இரண்டு பெண்மணிகள் காரில் இருந்து இறங்கி நடந்துவந்தனர். அவர்களுள் கையில் கைக்குழந்தையை ஒரு பாதுகாப்பாக தூக்கிகொண்டு மழை நீர் தேங்கியிருந்த சாலையில் காலை எடுத்துவைத்து நடந்தார். ஆனால் அவர் எதிர்பாராத வண்ணம், சாலையில் இருந்த குழிக்குள் கைக்குழந்தையுடன் தவறி விழுந்துள்ளார்.

ஆனால் மீண்டும் எழமுடியாமல் கைக்குழந்தையுடன் அந்த பெண், அந்த அகலமான குழிக்குள் தத்தளித்துள்ளார். எனினும் கைக்குழந்தையை தன் சக்திக்கும் மீறி தண்ணீரில் மூழ்கிவிடாதபடி காப்பாற்றவும் முனைகிறார். இதைப் பார்த்த அந்த பெண்ணின் உடன் வந்த பெண்ணும், திடீரென அங்கு வந்த இரண்டு பொதுமக்களும் அந்த பெண்ணிடம் இருந்து குழந்தையை வாங்கிக்கொண்டு அப்பெண்ணை மீட்டு மருத்துவமனைக்குக் கொண்டுசென்றனர். இந்த காட்சி அங்குள்ள சிசிடிவி கேமராக்களில் பதிவானதை அடுத்து, இதைப் பார்ப்பவர்களை பதைபதைக்கவைத்திருந்தது.