சென்னை சென்ட்ரல் ரயில் நிலைய ‘பிளாட்பார்ம்’ டிக்கெட் விலை உயர்வு..! எவ்ளோனு ‘செக்’ பண்ணிக்கோங்க..!

கோடை விடுமுறையை முன்னிட்டு எம்.ஜி.ஆர் சென்ட்ரல் ரயில் நிலைய பிளாட்பார்ம் டிக்கெட் விலை 3 மாதங்களுக்கு உயர்த்தப்பட உள்ளதாக தகவல் வெளியாகியுள்ளது.

சென்னை எம்.ஜி.ஆர் சென்ட்ரல் ரயில் நிலையத்துக்கு தினமும் ஆயிரக்கணக்கான பயணிகள் வந்து செல்கின்றனர். அங்கு பயணிகளை வழி அனுப்ப வருபவர்கள் பிளார்ட்பார்ம் டிக்கெட் எடுக்க வேண்டும். கடந்த 2015ம் ஆண்டு 5 ரூபாயில் இருந்த பிளார்ட்பார்ம் டிக்கெட் 10 ரூபாய்க்கு உயர்த்தப்பட்டது.

இந்த நிலையில் சென்னை எம்.ஜி.ஆர் சென்ட்ரல் ரயில் நிலையத்தில் மட்டும் 3 மாதங்களுக்கு பிளார்ட்பார்ம் டிக்கெட் விலை உயர்த்தப்பட உள்ளதாக தெற்கு ரெயில்வே தெரிவித்துள்ளது. கோடை விடுமுறையின் போது வரும் கூட்டத்தைக் கட்டுப்படுத்தும் வகையில் ஏப்ரல் 1ம் தேதி முதல் ஜூன் 30ம் தேதி வரை 3 மாதங்களுக்கு பிளார்ட்பார்ம் டிக்கெட் விலை 10 ரூபாயில் இருந்து 15 ரூபாய்க்கு உயர்த்தப்பட்டுள்ளது. 3 மாதங்கள் கழித்து மீண்டும் 10 ரூபாய்க்கே பிளார்ட்பார்ம் டிக்கெட் விற்கப்படும் எனத் தெரிவிக்கப்பட்டுள்ளது.