'பரபரப்பாகும் தமிழக அரசியல் களம்'... 'முதல்வர் வேட்பாளர் யார்?'... பாஜக மேலிடப் பொறுப்பாளர் அதிரடி கருத்து!
முகப்பு > செய்திகள் > தமிழகம்அதிமுகவின் முதல்வர் வேட்பாளராக, எடப்பாடி பழனிச்சாமி ஏற்கனவே அறிவிக்கப்பட்டிருக்கும் நிலையில், முதல்வர் வேட்பாளர் யார் என்பது குறித்து பாஜக மேலிடப் பொறுப்பாளர் சி.டி.ரவி கூறியுள்ள கருத்து பரபரப்பை ஏற்படுத்தியுள்ளது.
![The NDA coordination committee will announce the TN CM Candidate The NDA coordination committee will announce the TN CM Candidate](http://tamil.behindwoods.com/news-shots-tamil-news/images/tamilnadu/the-nda-coordination-committee-will-announce-the-tn-cm-candidate.jpg)
வரும் தமிழகச் சட்டமன்ற தேர்தலில், அதிமுக, பாஜக கூட்டணி தொடருமா என பல்வேறு கேள்விகள் நிலவி வந்த நிலையில், தமிழகம் வந்த உள்துறை அமைச்சர் அமித்ஷா கலந்து கொண்ட விழாவில் பேசிய முதல்வர் எடப்பாடி பழனிசாமியும், அதிமுக ஒருங்கிணைப்பாளர் பன்னீர்செல்வமும் அதிமுக பாஜக கூட்டணி தொடரும் என்று கூறினர். இதனிடையே எதிர்வரும் சட்டப்பேரவைத் தேர்தலில், அதிமுகவின் முதல்வர் வேட்பாளராக எடப்பாடி பழனிசாமியே நீடிப்பார் என அக்கட்சி சார்பில் ஒருங்கிணைப்பாளர் ஓ. பன்னீர்செல்வம் அறிவித்தார்.
இந்நிலையில் பாஜக - அதிமுக கூட்டணியின் முதல்வர் வேட்பாளர் எடப்பாடி பழனிசாமி தான் என்பதை அதிமுக தெரிவித்து விட்ட நிலையில், செய்தியாளர்களிடம் பேசிய தமிழக பாஜக தலைவர் எல்.முருகன், “யார் முதல்வர் வேட்பாளர் என்பதை பாஜக தலைமை தான் முடிவு செய்யும். முதல்வர் வேட்பாளர் அதிமுக தலைவராக இருப்பினும், அது குறித்தான அறிவிப்பை பாஜக தலைமையே அறிவிக்கும்” எனத் தெரிவித்தார்.
பாஜக தலைவரின் கருத்து கடும் சர்ச்சையைக் கிளப்பிய நிலையில் அதிமுகவினர் பலர் முருகனுக்குப் பதிலளிக்கும் விதமாக முதல்வர் வேட்பாளர் எடப்பாடி பழனிசாமிதான் என்று உறுதியாகக் கூறினர். சமீபத்தில் நடந்த அதிமுக கூட்டத்திலும் முதல்வர் வேட்பாளர் குறித்து அதிமுக, தன்னுடைய உறுதியைப் பதிவு செய்திருந்தது. இந்த சூழ்நிலையில் இன்று செய்தியாளர்களைச் சந்தித்த பாஜக மேலிடப் பொறுப்பாளர் சி.டி.ரவி, ''தேர்தல் வெற்றிக்குப் பின், முதல்வர் வேட்பாளரைத் தேசிய ஜனநாயகக் கூட்டணியின் ஒருங்கிணைப்புக் குழுதான் கூடி முடிவெடுக்கும்.'' எனத் தெரிவித்துள்ளார்.
சி.டி.ரவியின் இந்த கருத்து தமிழக அரசியல் களத்தில் மீண்டும் பரபரப்பை ஏற்படுத்தியுள்ளது. ஏற்கனவே பாஜக தலைவர்கள் சிலர் அதிமுக அரசை விமர்சித்து வரும் நிலையில், சி.டி.ரவியின் இந்த கருத்து மீண்டும் சர்ச்சையை ஏற்படுத்தியுள்ளது.
![](https://www.behindwoods.com/images/spacer.gif)
மற்ற செய்திகள்
![](https://www.behindwoods.com/images/spacer.gif)