அரையாண்டு 'விடுமுறை' மேலும் நீட்டிக்கப்பட வாய்ப்பு... புதிய தேதி 'குறித்து' விரைவில் அறிவிப்பு?

உள்ளாட்சி தேர்தல் வாக்கு எண்ணிக்கை ஜனவரி 2-ம் தேதி நடைபெற உள்ளது. வாக்கு எண்ணிக்கை மறுநாளும் நீட்டிக்கப்பட வாய்ப்பு இருப்பதால் பள்ளிகளுக்கு அரையாண்டு விடுமுறை மேலும் நீட்டிக்கப்பட வாய்ப்பு இருப்பதாக தகவல்கள் வெளியாகியுள்ளன.

எப்போதும் பள்ளி மாணவர்களுக்கு அரையாண்டு விடுமுறை முடிந்து பள்ளிகள் ஜனவரி 2-ம் தேதி திறக்கப்படும். ஆனால் அன்றைய தினம் உள்ளாட்சி தேர்தல் வாக்கு எண்ணிக்கை இருப்பதால், ஜனவரி 3-ம் தேதி பள்ளி திறக்கப்படும் என்று பள்ளிக்கல்வித்துறை அறிவித்தது.

இந்தநிலையில் வாக்கு எண்ணிக்கை மறுநாளும் தொடர வாய்ப்புகள் இருப்பதால், ஜனவரி 3-ம் தேதி பள்ளிகளுக்கு விடுமுறை அளிக்கப்படும் என்று கூறப்படுகிறது. குறிப்பாக ஆசிரியர்கள், தலைமையாசிரியர்கள், பணியாளர்கள் மற்றும் தனியார் பள்ளி ஆசிரியர்கள் உட்பட அனைவரும் வாக்கு எண்ணிக்கையில் ஈடுபட வேண்டி உள்ளதால் 3-ம் தேதி பள்ளிக்கு செல்ல முடியாத நிலை உள்ளது.

எனவே, பள்ளிகள் திறக்கும் தேதியை மாற்ற வேண்டும் என்று தமிழ்நாடு அரசு ஊழியர்கள் ஆசிரியர்கள் நல கூட்டமைப்பு அரசுக்கு வேண்டுகோள் விடுத்தது. 4 மற்றும் 5-ம் தேதிகள் சனி, ஞாயிறாக இருப்பதால் பள்ளிகள் 6-ம் தேதி திறக்கப்பட வாய்ப்புகள் இருப்பதாக தகவல்கள் வெளியாகியுள்ளன. இதுதொடர்பாக தற்போது உயர் அதிகாரிகள் தற்போது ஆலோசனையில் ஈடுபட்டு உள்ளனர். விரைவில் இதுகுறித்த அறிவிப்பு வெளியாகும் என எதிர்பார்க்கப் படுகிறது.