'சீனாவுக்கு' எதிராக '18 அம்சத் திட்டம்...' 'அமெரிக்காவுடன்' கை கோர்க்கும் 'இந்தியா...' 'இந்தியாவுக்கு' அடிக்கப் போகும் 'ஜாக்பாட்...'

கொரோனா வைரஸ் குறித்த தகவல்களை மூடி மறைத்த விவகாரத்தில் சீனாவை பொறுப்பேற்க வைக்கும் 18 அம்ச திட்டத்தை அமெரிக்கா தயாரித்துள்ளது.

இத்திட்டத்தின் ஒரு பகுதியாக இந்தியா உடனான ராணுவ உறவுகளை மேம்படுத்துவது, தேவையான கருவிகளை இந்தியாவுக்கு விற்பனை செய்வது என முடிவு செய்துள்ளனர்.

கொரோனா வைரஸ் சீனாவின் வூஹான் ஆய்வகத்திலிருந்து பரவியது என்றும், சீனா ஆரம்பகட்ட தகவல்களை மறைத்து உலகை இத்தகைய நிலைக்கு தள்ளிவிட்டதாகவும் அமெரிக்க அதிபர் டிரம்ப், தொடர்ந்து குற்றம்சாட்டி வருகிறார்.

இந்த விவகாரத்தில் சீன அரசாங்கத்தை பொறுப்பேற்க வைக்க, இந்தியாவுடனான இராணுவ உறவை மேம்படுத்துவது உட்பட 18 அம்ச திட்டத்தை அமெரிக்காவின் முக்கிய செனட்டர் டாம் தில்லிஸ் வெளியிட்டுள்ளார்.

இத்திட்டத்தின் முக்கிய அம்சமாக பிராந்திய நட்பு நாடுகளான இந்தியா, தைவான் மற்றும் வியட்நாம் உடனான ராணுவ உறவை மேலும் அதிகரிக்கவும், தேவையான உபகரணங்களை விற்கவும் அமெரிக்கா அழைப்பு விடுத்துள்ளது. அதே போல் ஜப்பான் ராணுவத்தை மறுகட்டமைக்க ஊக்குவிக்க வேண்டும், ஜப்பானுக்கும், தென் கொரியாவுக்கும் தேவையான ஆயுதங்களை வழங்க வேண்டும் என்றும் இத்திட்டத்தில் கூறப்பட்டுள்ளது.

மேலும் இத்திட்டம் சீன உற்பத்திகளை அமெரிக்காவே தயாரிப்பது, விநியோக சங்கிலிக்காக சீனாவை சார்ந்திருப்பதை படிப்படியாக நீக்குவது, அமெரிக்க தொழில்நுட்பங்களை சீனா திருடாத வகையில் சைபர் பாதுகாப்பை பலப்படுத்துவது, சீன தொழில்நுட்ப நிறுவனமான ஹூவாவேவுக்கு தடை, நட்பு நாடுகளையும் தடை விதிக்க கோருவது, வைரஸ் பற்றி பொய் கூறியதற்காக பொருளாதார தடை மற்றும் நஷ்டஈடு கோருவது, 2022 குளிர்கால ஒலிம்பிக் போட்டிகளை பீஜிங்கிலிருந்து மாற்றுவது போன்ற அதிரடி அம்சங்களை கொண்டுள்ளது.