‘மைக் பிரச்சனை’.. டக்குனு ஓடிவந்து விஜய் செய்த காரியம்! நெகிழ்ந்து போன பாடகி Varisu audio launch

வாரிசு படத்தில் நடிகர் விஜய்யுடன் ராஷ்மிகா மந்தனா முதல் முறையாக இணைந்து நடித்துள்ளார். இவர்களுடன் பிரபு, சரத் குமார், பிரகாஷ் ராஜ், ஜெயசுதா, குஷ்பு, ஸ்ரீகாந்த், ஷாம், யோகி பாபு, சங்கீதா, சம்யுக்தா எனப் பெரிய நட்சத்திர பட்டாளமே இந்த படத்தில் நடித்துள்ளனர். இப்படத்திற்கு, ஹரி மற்றும் ஆஷிஷோர் சாலமன், விவேக் இணைந்து கதை & கூடுதல் திரைக்கதை எழுதி உள்ளனர். இசை மற்றும் ஒளிப்பதிவு முறையே எஸ் தமன் மற்றும் கார்த்திக் பழனி கவனித்து வருகின்றனர். கேஎல் பிரவீன் படத்தொகுப்பாளராக பணியாற்றுகிறார்.

வாரிசு படத்தின் இசை வெளியீட்டு விழா, 24.12.2022-ல் நடைபெறுகிறது. நேரு உள்விளையாட்டு அரங்கில் நடந்த இந்த நிகழ்வில், விஜய், ராஷ்மிகா மந்தனா , எஸ்.ஏ.சந்திரசேகர், ஷோபா சந்திரசேகர், வாரிசு பட தயாரிப்பாளர் தில் ராஜூ,  இயக்குநர் வம்சி பைடிபள்ளி, இசையமைப்பாளர் தமன், ஷங்கர் மகாதேவன், டிரம்ஸ் சிவமணி, இயக்குநர் லோகேஷ் கனகராஜ், பிரகாஷ் ராஜ், சரத்குமார், நடிகர் ஷாம் மற்றும் பலர் கலந்துகொண்டுள்ளனர்.

இந்நிகழ்வில், ரஞ்சிதமே பாடலை வாரிசு படத்தில் பாடியுள்ள பாடகி மானசி, மேடையில் நடிகர் தளபதி விஜய் உடன் ரஞ்சிதமே பாடலை பாடிய அனுபவம் குறித்து பேச முற்பட்டார். அந்த சமயத்தில் அவரது மைக் திடீரென வேலை செய்யாமல் கோளாறு ஏற்பட்டதாக தெரிகிறது. அந்த நொடியில் நடிகர் விஜய் உடனடியாக மேடையில் ஏறி வேறொரு மைக்கை அவர் கையில் கொடுத்துள்ளார். விஜய்யின் இந்த செயல் நிகழ்வு அரங்கத்தில் அனைவரையும் மனம் நெகிழ வைத்துள்ளது. மேலும்  ரசிகர்கள் ஆரவாரம் எழுப்பியதை அடுத்து, இந்த விஷயம் இணையத்தில் அதிகம் வைரலாகி வருகிறது.

வம்சி பைடிப்பள்ளி இயக்கத்தில் விஜய் நடித்துள்ள 'வாரிசு' திரைப்படம் 2023 ஆம் ஆண்டு பொங்கல் பண்டிகையை முன்னிட்டு வெளியாகும் என்றும் அதிகாரபூர்வமாக அறிவிக்கப்பட்டுள்ளது.