"தேவதைகள் எந்த பெயரில் அழைக்கபட்டால் என்ன?".. கர்ணன் இயக்குநர் பரபரப்பு அறிக்கை!

இந்நிலையில் இந்த படத்தின் பாடல்கள் ஏற்கனவே வெளியாகி வரவேற்பைப் பெற்றிருந்தன. குறிப்பாக கண்டா வரச்சொல்லுங்க பாடல் நல்ல வரவேற்பைப் பெற்றது. இதில் அண்மையில் வெளியான பண்டாரத்தி புராணம் பாடல் குறிப்பிட்ட சமூகத்தினை புண்படுத்துவதாய் இருப்பதாக வழக்கு உருவானதை அடுத்து அந்த பாடல் தற்போது மஞ்சனத்தி புராணம் என பெயர் மாற்றப்பட்டுள்ளது. 

இதுபற்றி அறிக்கை வெளியிட்டுள்ள இயக்குநர் மாரி செல்வராஜ். “கர்ணன் திரைப்படம் தொடங்கிய நாளிலிருந்து இன்று வரை நீங்கள் அளித்துவரும் ஆதரவும் நம்பிக்கையும் எனக்கு பெரும் உத்வேகத்தையும் மகிழ்ச்சியையும் அளிக்கிறது. ஒரு இளம் இயக்குநரான என் மீதும் நீங்கள் காட்டும் எதிர்பார்ப்பும் மரியாதையும் தான் சினிமா என்னும் மாயக்கலையை எவ்வளவு பொறுப்போடு நான் அணுக வேண்டும் என்பதை எனக்கு கற்றுகொடுக்கிறது. அத்தகைய பொறுப்புணர்ச்சியோடும் கலைத்தன்மையோடும்தான் நான் என் காட்சி படிமங்களை பெரும் சிரத்தையோடு உருவாக்குகிறேன்.

பண்டாரத்தி புராணமும் அப்படி உருவாக்கபட்டதுதான். சொந்த அத்தையாக அக்காவாக ஆச்சியாக பெரியம்மாவாக என் நிலத்தோடும் என் இரத்தத்தோடும் கலந்து காலத்தின் தேவதைகளான பண்டாரத்திகளின் கதைகளைத்தான் நான் என் திரைக்கதையின் கூழாங்கற்களாக சிதறவிட்டு காட்சிபடுத்தினேன். ஆனால் நம் சமூக அடுக்குமுறை உளவியலில் சில பெயர்கள் ஏற்படுத்தும் தாக்கம் என்பது புரிந்துகொள்ள முடியாததாகவும் விலக முடியாததாகவும் இருக்கிறது. அதன் அடிப்படையில் பண்டாரத்தி புராணம் பாடலுக்கு ஏற்பட்டிருக்கும் விவாதத்தையும் வருத்தத்தையும் கோரிக்கையையும் முடித்து வைப்பதற்காக இனி பண்டாரத்தியை மஞ்சனத்தி என்று அழைக்கலாம் என்று முடிவு செய்திருக்கிறோம்.

#karnan 🐘 pic.twitter.com/JNwtRcEBcW

— Mari Selvaraj (@mari_selvaraj) March 25, 2021

தேவதைகள் எந்த பெயரில் அழைக்கபட்டாலென்ன ... பெயர் மாறுவதால் அவர்கள் காட்டும் மாட வெளிச்சம் குறைந்துவிட போகிறதா என்ன? இனி ஏமராஜாவின் மாடவிளக்காக மஞ்சனத்தி இருப்பாள். இனி ஏமன் கர்ணனை ஆட வைப்பதற்காக மஞ்சனத்தி புராணத்தை பாடுவான் கர்ணன் ஆடுவான் .ஆதரவளித்த அனைவருக்கும் நன்றியும் ப்ரியமும் எப்போதும்...காதலே பிரபஞ்ச மாடத்தின் வெளிச்சம். இந்த பெயர் யூடியூபிலும் மாற்றப்படுகிறது” என குறிப்பிட்டுள்ளார். 

ALSO READ: அஜித் சாரின் விஸ்வாசம் படத்துக்காக தேசிய விருது.. விஜய் அண்ணனோட தமிழன் படத்தில தொடங்கிய பயணம்.. இமான் நெகிழ்ச்சி.. இதுதான் காரணம்!